БПС-Сбербанк ніякі не “Б”, а “дачка” расійскага Сбера. Калі вы асабіста далучыліся да санкцый Еўразвяза, варта мець гэта на ўвазе. Ну прынамсі дае работу колькім беларусам, во нават у Новалукомлі. А як завуцца гэтыя экзатычныя дрэвы, то ведаюць толькі сапраўдныя батанікі.

 

Мы выйшлі на вуліцу Энэргетыкаў. На ёй, прыблізна ў сярэдзіне, месціцца ўлада. Раней то быў выканкам, а як яго зараз – не надта важна, сутнасць не змянілася. Над уваходам бела-блакітны сцяг Новалукомля. Колеры абраныя таму, што места стаіць на возеры, а што сцяг падобны на “значкі” беларускіх гусараў Расійскай Імперыі ды літоўскіх уланаў Напалеона, то выпадкова атрымалася.

Па гэтай невялічкай плошчы хадзіце абачліва, бо з будынку выканкама якраз сюды глядзіць “жывая камера” мясцовага канала телебачання Trianda (праўда ці не, што яго заснавальнікамі былі “тры Андрэя”, але іншага тлумачэння назвы няма).

І тут вы ўжо заўважылі звон праваслаўнай  царквы.